Görürdüm bu günü

Bu da sonuncu gün. Sonuncu vida ,
Bu da ayrılığın sonuncu tini .
Quzum, hər görüşün son ucu vida ,
Görürdüm bu günü,
Səninlə görüşün birinci günü ...
Yolun uğurlu olsun deyirəm sənə ;
Qarşında ömür gün sınağı durur .
Nə deyim , bəlkə də yolunda yenə
Mənim tək bir sevda qonağı durur .
Gedirsən ,
Bu günü saxla yadında
Yaddaşın mən verən dərsi pozmasın .
Sən elə alış ki , sənin odunda
Ötəri qonaqlar qoy qızınmasın .
Qarşımda nə çəpər, nə də ki barı ...
Mənim də ömrümə beləcə gəldin .
Qəlbində bir çınqı od saxla barı
Bəlkə bir çırağı yandıra bildin .
Əyil !...
Məhəbbətin önündə əyil ,
Bəlkə bu dünyadan qopara səni .
Taleyin estafet ağacı deyil
Hərə bir mənzilə apara səni ...
Bir gün də sərbəstlik taxtı devrilib ,
Ömrünə gəlinlik illəri gələr .
Dünənin bir namərd dosta çevrilib
Sabah kəndirini doğraya bilər .
Bu da sonuncu gün, sonuncu vida,
Bu da ayrılığın sonuncu tini .
Quzum, hər görüşün son ucu vida,
Görürdüm bu günü,
Səninlə görüşün birinci günü ...

Nüsrət kəsəmənli

گؤروردوم بو گونو

بو دا سونونجو گون. سونونجو ویدا ،

بو دا آیریلیغین سونونجو تینی .

قوزوم، هر گؤروشون سون اوجو ویدا ،

گؤروردوم بو گونو،

سنینله گؤروشون بیرینجی گونو ...

یولون اوغورلو اولسون دئییرم سنه ؛

قارشیندا اؤمور گون سیناغی دورور .

نه دئییم ، بلكه ده یولوندا یئنه

منیم تك بیر سئودا قوناغی دورور .

گئدیرسن ،

بو گونو ساخلا یادیندا

یادداشین من وئرن درسی پوزماسین .

سن ائله آلیش كی ، سنین اودوندا

اؤتری قوناق‌لار قوی قیزینماسین .

قارشیمدا نه چپر، نه ده كی باری ...

منیم ده اؤمرومه بئله‌جه گلدین .

قلبینده بیر چینقی اود ساخلا باری

بلكه بیر چیراغی یان‌دیرا بیلدین .

اییل !...

مهببتین اؤنونده اییل ،

بلكه بو دونیا‌دان قوپارا سنی .

تالئیین ائستافئت آغاجی دئییل

هره بیر منزیله آپارا سنی ...

بیر گون ده سربست‌لیك تاختی دئوریلیب ،

اؤمرونه گلین‌لیك ایللری گلر .

دونه‌نین بیر نامرد دوستا چئوریلیب

ساباه كن‌دیرینی دوغرایا بیلر .

بو دا سونونجو گون، سونونجو ویدا،

بو دا آیریلیغین سونونجو تینی .

قوزوم، هر گؤروشون سون اوجو ویدا،

گؤروردوم بو گونو،

سنینله گؤروشون بیرینجی گونو ...

نصرت كسمنلی