Tez Gəl

Genə kədər tozunda çulğalanmışam tez gəl

Amandı nisgil əlindən talanmışam tez gəl

 

Yaşıl-yaşıl pozulub gül çiçəklərim soldu

Xəzəl-xəzəl əzilib ovxalanmışam tez gəl

 

Qəzəl-qəzəl yazılar varaq-varaq pozulur

Əzalı bir qəzəl üstə calanmışam tez gəl

 

Saman kimi saralan arzılar deşir döşümü

Dilim-dilim bölünüb parçalanmışam tez gəl

 

Göz-gözə gözümün yaşlarında qərq oluram

Dəniz-dəniz doluban çalxalanmışam tez gəl

 

Bodarlıyıb çalağan ağ göyərçinin sinəsin

Qızıl-qızıl qan olub laxtalanmışam tez gəl

 

O qədər gözlərimə və’də vermişəm gələcək

Gözümdən ayna görüb yay calanmışam tez gəl

 

Xulasə sözlərim ağzımda ağrıyan gündən

Söz olmuşam, sözün üstə qalanmışam tez gəl

 

Huşəng Cəfəri Zənganlı (Cəfəri)

تئز گل

 

گئنه كدر توزوندا چولغالانمیشام تئز گل

آماندی نیسگیل الیندن تالانمیشام تئز گل

 

یاشیل-یاشیل پوزولوب گول چیچكلریم سولدو

خزل-خزل ازیلیب اووخالانمیشام تئز گل

 

قزل-قزل یازیلار واراق-واراق پوزولور

ازالی بیر قزل اوسته جالانمیشام تئز گل

 

سامان كیمی سارالان آرزیلار دئشیر دؤشومو

دیلیم-دیلیم بؤلونوب پارچالانمیشام تئز گل

 

گؤز-گؤزه گؤزومون یاشلاریندا غرق اولورام

دنیز-دنیز دولوبان چالخالانمیشام تئز گل

 

بودارلیییب چالاغان آغ گؤیرچی نین سینه سین

قیزیل-قیزیل قان اولوب لاختالانمیشام تئز گل

 

او قدر گؤزلریمه و’ده وئرمیشم گله جك

گؤزومدن آینا گؤروب یای جالانمیشام تئز گل

 

خولاسه سؤزلریم آغزیمدا آغرییان گوندن

سؤز اولموشام، سؤزون اوسته قالانمیشام تئز گل

 

هوشنگ جعفری زنگانلی (جعفری)