Azərbaycan

Çox keçmişəm bu dağlardan,
Durna gözlü bulaqlardan;
Eşitmişəm uzaqlardan
Sakit axan arazları;
Sınamışam dostu, yarı...

El bilir ki, sən mənimsən,
Yurdum, yuvam, məskənimsən,
Anam, doğma vətənimsən!
Ayrılarmı könül candan?
Azərbaycan, Azərbaycan!

Mən bir uşaq, sən bir ana,
Odur ki, bağlıyam sana,
Hankı səmtə, hankı yana
Hey uçsam da yuvam sənsən,
Elim, günüm, obam sənsən!

Fəqət səndən gen düşəndə,
Ayrılıq məndən düşəndə,
Saçlarıma dən düşəndə
Boğar aylar, illər məni,
Qınamasın ellər məni.

Dağlarının başı qardır,
Ağ örpəyin buludlardır.
Böyük bir keçmişin vardır;
Bilinməyir yaşın sənin,
Nələr çəkmiş başın sənin.

Düşdün uğursuz dillərə,
Nəhs aylara, nəhs illərə,
Nəsillərdən-nəsillərə
Keçən bir şöhrətin vardır;
Oğlun, qızın bəxtiyardır...

Hey baxıram bu düzlərə,
Alagözlü gündüzlərə,
Qara xallı ağ üzlərə
Könül istər şer yaza;
Gəncləşirəm yaza-yaza...

Bir tərəfin bəhri-Xəzər,
Yaşılbaş sonalar gəzər;
Xəyalım dolaşar gəzər
Gah Muğanı, gah Eldarı.
Mənzil uzaq, ömür yarı!

Sıra dağlar, gen dərələr,
Ürək açan mənzərələr...
Ceyran qaçar, cüyür mələr,
Nə çoxdur oylağın sənin!
Aranın, yaylağın sənin.

Keç bu dağdan, bu arandan,
Astaradan, Lənkərandan.
Afrikadan, Hindistandan
Qonaq gəlir bizə quşlar,
Zülm əlindən qurtulmuşlar...

Bu yerlərdə limon sarı,
Əyir, salır budaqları;
Dağlarının dümağ qarı
Yaranmışdır qarlı qışdan
Bir səngərdir yaranışdan.

Lənkəranın gülü rəng-rəng,
Yurdumuzun qızları tək.
Dəmlə çayı tök ver görək
Anamın dilbər gəlini!
Yadlara açma əlini.

Sarı sünbül bizim çörək,
Pambığımız çiçək-çiçək.
Hər üzümdən bir şirə çək
Səhər-səhər acqarına,
Qüvvət olsun qollarına.

Min Qazaxda köhlən ata,
Yalmanına yata-yata,
At qan-tərə bata-bata,
Göy yaylaqlar belinə qalx,
Kəpəz dağdan Göy gölə bax!

Ey azad gün, azad insan,
Doyunca iç bu bahardan!
Bizim xallı xalçalardan
Sər çinarlar kölgəsinə,
Alqış günəş ölkəsinə!

Könlüm keçir Qarabağdan,
Gah bu dağdan, gah o dağdan.
Axşamüstü qoy uzaqdan
Havalansın Xanın¹ səsi,
Qarabağın şikəstəsi.

Gözəl vətən! Mənan dərin,
Beşiyisən gözəllərin!
Aşıq deyər sərin-sərin,
Sən günəşin qucağısan,
Şer, sənət ocağısan.

Ölməz könül, ölməz əsər,
Nizamilər, Füzulilər!
Əlin qələm, sinən dəftər,
De gəlsin hər nəyin vardır,
Deyilən söz yadigardır.

Bir dön bizim Bakıya bax,
Sahilləri çıraq-çıraq,
Buruqları hayqıraraq
Nərə salır boz çöllərə,
İşıqlanır hər dağ, dərə!

Nazlandıqca sərin külək,
Sahillərə sinə gərək.
Bizim Bakı – bizim ürək!
İşıqdadır qüvvət sözü,
Səhərlərin ülkər gözü.

Gözəl vətən! O gün ki sən
Al bayraqlı bir səhərdən
İlham aldın... yarandım mən.
Gülür torpaq, gülür insan,
Qoca Şərqin qapısısan!

Dinlə məni, gözəl vətən!
Bir söz gəlir ürəyimdən:
Partiyanın eşqilə sən,
Güləcəksən hər bir zaman,
Azərbaycan, Azərbaycan!

 

آذربایجان

چوخ كئچمیشم بو داغ‌لاردان،

دورنا گؤزلو بولاق‌لاردان؛

ائشیتمیشم اوزاق‌لاردان

ساكیت آخان آرازلاری؛

سینامیشام دوستو، یاری...

 

ائل بیلیر كی، سن منیمسن،

یوردوم، یووام، مسكنیمسن،

آنام، دوغما وطنیمسن!

آیریلارمی كؤنول جان‌دان؟

آذربایجان، آذربایجان!

 

من بیر اوشاق، سن بیر آنا،

اودور كی، باغ‌لییام سانا،

هانكی سمته، هانكی یانا

هئی اوچسام دا یووام سنسن،

ائلیم، گونوم، اوبام سنسن!

 

فقط سن‌دن گئن دوشنده،

آیری‌لیق من‌دن دوشنده،

ساچ‌لاریما دن دوشنده

بوغار آیلار، ایللر منی،

قیناماسین ائللر منی.

 

داغ‌لارینین باشی قاردیر،

آغ اؤرپیین بولودلاردیر.

بؤیوك بیر كئچمیشین واردیر؛

بیلینمییر یاشین سنین،

نلر چكمیش باشین سنین.

 

دوشدون اوغورسوز دیل‌لره،

نهس آیلارا، نهس ایللره،

نسیل‌لردن-نسیل‌لره

كئچن بیر شؤهرتین واردیر؛

اوغلون، قیزین بختیاردیر...

 

هئی باخیرام بو دوزلره،

آلاگؤزلو گوندوزلره،

قارا خال‌لی آغ اوزلره

كؤنول ایستر شعر یازا؛

گنجلشیرم یازا-یازا...

 

بیر طرفین بهری-خزر،

یاشیلباش سونا‌لار گزر؛

خیالیم دولاشار گزر

گاه موغانی، گاه ائلداری.

منزیل اوزاق، اؤمور یاری!

 

سیرا داغ‌لار، گئن دره‌لر،

اورك آچان منزره‌لر...

جئیران قاچار، جوگور ملر،

نه چوخ‌دور اویلاغین سنین!

آرانین، یایلاغین سنین.

 

كئچ بو داغ‌دان، بو آران‌دان،

آستارا‌دان، لنكران‌دان.

آفریكا‌دان، هیندیستان‌دان

قوناق گلیر بیزه قوش‌لار،

ظلم علین‌دن قورتولموش‌لار...

 

بو یئرلرده لیمون ساری،

اییر، سالیر بوداق‌لاری؛

داغ‌لارینین دوماغ قاری

یارانمیش‌دیر قارلی قیش‌دان

بیر سنگردیر یارانیش‌دان.

 

لنكرانین گولو رنگ-رنگ،

یوردوموزون قیزلاری تك.

دمله چایی تؤك وئر گؤرك

آنامین دیلبر گلینی!

یادلارا آچما علینی.

 

ساری سونبول بیزیم چؤرك،

پامبیغیمیز چیچك-چیچك.

هر اوزوم‌دن بیر شیره چك

سهر-سهر آجقارینا،

قوت اولسون قول‌لارینا.

 

مین قازاخدا كؤهلن آتا،

یالمانینا یاتا-یاتا،

آت قان-تره باتا-باتا،

گؤی یایلاق‌لار بئلینه قالخ،

كپز داغ‌دان گؤی گؤله باخ!

 

ائی آزاد گون، آزاد اینسان،

دویونجا ایچ بو باهاردان!

بیزیم خال‌لی خالچا‌لاردان

سر چینارلار كؤلگه‌سینه،

آلقیش گونش اؤلكه‌سینه!

 

كؤنلوم كئچیر قاراباغ‌دان،

گاه بو داغ‌دان، گاه او داغ‌دان.

آخشاموستو قوی اوزاق‌دان

هاوالانسین خانین1 سسی،

قاراباغین شیكسته‌سی.

 

گؤزل وطن! معنان درین،

بئشیگیسن گؤزل‌لرین!

آشیق دئیر سرین-سرین،

سن گونشین قوجاغیسان،

شعر، سنت اوجاغیسان.

 

اؤلمز كؤنول، اؤلمز اثر،

نظامی‌لر، فضولی‌لر!

علین قلم، سینن دفتر،

دئ گلسین هر نیین واردیر،

دئییلن سؤز یادیگاردیر.

 

بیر دؤن بیزیم باكییا باخ،

ساحل‌لری چیراق-چیراق،

بوروق‌لاری هایقیرا‌راق

نره سالیر بوز چؤل‌لره،

ایشیق‌لانیر هر داغ، دره!

 

نازلاندیقجا سرین كولك،

ساحل‌لره سینه گرك.

بیزیم باكی – بیزیم اورك!

ایشیقدا‌دیر قوت سؤزو،

سهرلرین اولكر گؤزو.

 

گؤزل وطن! او گون كی سن

آل بای‌راق‌لی بیر سهردن

ایلهام آلدین... یاراندیم من.

گولور تورپاق، گولور اینسان،

قوجا شرقین قاپی‌سیسان!

 

دینله منی، گؤزل وطن!

بیر سؤز گلیر اورییم‌دن:

پارتیانین عشقیله سن،

گوله‌جكسن هر بیر زامان،

آذربایجان، آذربایجان!