Baştutmayan sevda
Şagirlər:
Istəyirsən ki məəllim!biz ürəkdən barişax
Ağzımızda dilimiz var qoy o dildə danışax
Mədəniyyət bürümüş elmilə dünya üzuni
Daha təmbəlligi at gəl gecə-gündüz çalışax
Məəllim:
içtibah eyləməyin var hər işin qaidəsi
o şirin yerli dilin mərkəzə yoxfayidəsi
əmr ediblər ki soxam ağziza cəbrən bu dili
dünyada (fas)dilidir cümlə dilin validəsi
Şagirlər:
Ey məəlim onü oyrənməyə yox taqətimiz
Anadildə danışib- gülmay olub aadətimiz
Çox böyükdür o dili qoyma girə ağzımıza
Biz təsəvvur eylədikcə dəyişir halətimiz!
Məəllim:
Siz uşaxsız nə bilirsiz ay oğul yaxşı – yaman
Xorasanda bu dilə hörmət edir pir-o-cavan
Onların xatirinə sizdə gərək oyrənəsiz
Sözümü rədd edəsiz dövlət edər başqa guman!
Şagirlər:
Ay məəllim! Bir utan ,Reyli Gilanlı deyilik
Elimiz yurdumuz ayrı, Gavalanlı deyilik
Azəristandı bizim millətimiz tarixə bax
Məədədən söyləmirik,fikri dumanlı deyilik!
Məəllim:
Mənə tarix oxumax indi yaraşmaz bilirəm
Düzi lap zor-zorakı haqqızı inkar edirəm
Dilizi tərk eləyib indi gərək ,,FAS,,laşasız
Adızı tarixin əvvəl vərəğindən silirəm
MƏHƏMMƏD BİRİYA
باش توتمایان سئودا
شاگیردلر:
ایسته ییرسن كی معلم! بیز اوركدن باریشاق
آغزیمیزدا دیلیمیز وار، قوی او دیلده دانیشاق
مدنیت بوروموش علم له دونیا اوزونو
داها تنبل لیگی آت، گل گئجه- گوندوز چالیشاق
معلم:
اشتباه ائیله مه یین، وار هر ایشین قاعده سی
او شیرین یئرلی دیلین، مركزه یوخ فاییده سی
امر ائدیبلر كی سوخام آغزینیزا جبرا بو دیلی
دونیادا((فارس)) دیلی دیر جمله دیلین والده سی!
شاگیردلر:
ای معلم! اونو اورگنمه یه یوخ طاقتیمیز
آنا دیلده دانیشیب- گولمك اولوب عادتیمنیز
چوخ بویوك دیر او دیلی قویما گیره آغزیمیزا
بیز تصور ائله دیكجه ده گیشیر حالتیمیز!
معلم:
سیز اوشاقسیز، نه بیلیرسیز آی اوغول یاخشی- یامان
خوراساندا بو دیله حرمت ائدیر پیروجوان
اونلارین خاطیرینه، سیزده گره ك اورگنه سیز
سوزومو رد ائله سیز، دولت ائدر باشقا گمان!
شاگیردلر:
آی معلم! بیر اوتان ری لی، گیلانلی دئییلیك
ائلیمیز، یوردوموز آیری، گاوالانلی دئییلیك
آذرستاندی بیزیم میللتیمیز، تاریخه باخ
معده دن سویله میریك، فیكری دومانلی دئییلیك!
معلم:
منه تاریخ اوخوماق ایندی یاراشماز بیلیرم
دوزو، لاپ زور- زوراكی حاققیزی انكار ائدیرم
دیلیزی ترك ائله ییب ایندی گره ك ((فارسلاشاسیز))!
آدیزی تاریخین اول ورقیندن سیلیرم!
یازان: مه حه ممد بی رییا