Xan nənə

Xan nənə !hayanda qaldın

Belə başıva dolanım

Necə mən səni itirdim?

Da sənin tayın tapılmaz

Sən ölən gün əmmə gəldi,

Məni getdi ayrı kəndə

Mən uşaq nə anlıyaydım?

Başımı gatıp uşaqlar

Neçə gün mən orda galdım.

Gayıdıp gələndə baxdım

Yerivi yığışdırıplar

Nə özün və nə yerin var.

"Hanı Xan nənəm?"-Soruşdum.

Dedilər ki, Xan nənəni

Aparıplar Kərbəlayə

Ki şəfasın ordan alsın

Səfəri uzun səfərdir

Bir iki il çəkər gəlincə

Necə ağlaram yanıxlı ?

Neçə gün elə çığırdım,

Ki səsim, sinəm tutuldu

O mən olmasam yanında,

Özü heç yerə gedənməz

Bu səfər nolupdı mensiz

Özü tək goyup gedipdi ?

Hamıdan acığ edərkən

Hamıya acığlı bakdım

Sonra başladım ki:Mən də

Gedirəm onun dalınca

Dedilər səninki tezdir.

İmamın məzarı üstdə

Uşağı aparmag olmaz.

Sən oxu Qur'anı tez çıx

Sən onu çıxınca bəlkə

Gələ xan nənən səfərdən

Təlesik ravanlamaxda

Oxuyup Qur'anı çıxdım

Ki yazım sənə: Gəl indi

Daha çıxmışam Qur'anı

Mənə sovgət al gələndə

Amma hər kağaz yazanda

Ağamın gözü dolardı

Sən də ki, gəlip çıxmadın

Neçə il bu intizarla

Günü həftəni sayardım

Ta yavaş-yavaş göz açdım

Anladım ki, sən ölüpseən

Bilə-bilmiyə henüz de

Ürəyimdə bir itik var

Gözüm axtarır həmişə.

Nə yamandı bu itiklər

Xan nənə, canım nolaydı

Seni bir də mən tapaydım

O ayaglar üstə bir də

Döşənip bir ağlayaydım

Golu halgə salmış ip tək

O ayağı bağlıyaydım

Ki, daha gedənmiyeydin

Gecələr yatanda, sən də

Meni goynuva alardın

Necə bağrıva basardın ?!

Golun üstə gah salardın

Acı dünyanı atarkən

İkimiz şirin yatardıx

Yuxuda löley atarkən

Səni mən bələşdirərdim

Gecəli, su gızdırardın

Özüvü təmizleyərdin

Gene də məni öpərdin

Heç mənə acıxlamazdın

Savaşan mənə kim olsun

Sən mənə havar durardın

Məni sən anam döyəndə

Gapıp aradan çıkardın.

Elə istilik o istək ?!

Daha kimsədə olarmı ?!

Ürəyim deyir ki: Yox, yox

O dərin səfalı istək

Mənim o əzizliyim tək

Sənilə gedip tükəndi

Xən nənə, özün deyərdin

Ki, sənə behiştdə Allah

Verəcək nə istiyürsən

Bu sözün yadında galsın

Mənə qolunu veripsən

Elə bir günüm olursa

Bilirsən nə istərəm mən ?

Sözümə dürüst gulax ver

"Senilə uşaxlıq əhdin

Xan nənə, aman nolaydı

Bir uşaxlığı tapaydım ?!

Bir də mən sənə çataydım

Sənilə gucaxlaşaydım

Sənilə bir ağlaşaydım

Yenidən uşağ olurkən

Gucağında bir yataydım

Elə bir behişt olursa

Daha mən öz Allahımdan

Başga bir şey istəməzdim

Şəhryar əmi

خان ننه

 

خان ننه ، هایاندا قالدین

بئله باشیوا دولانیم

نئجه من سنی ایتیردیم !

دا سنین تایین تاپیلماز

...

سن اؤلن گون ، عمه گلدی

منی گه تدی آیری كنده

من اوشاق ، نه آنلایایدیم ؟

باشیمی قاتیب اوشاقلار

نئچه گون من اوردا قالدیم

...

قاییدیب گلنده ، باخدیم

یئریوی ییغیشدیریبلار

نه اؤزون ، و نه یئرین وار

« هانی خان ننه م ؟ » سوروشدوم

دئدیلر كی : خان ننه نی

آپاریبلا كربلایه

كی شفاسین اوردان آلسین

سفری اوزون سفردیر

بیرایكی ایل چكر گلینجه

...

نئجه آغلارام یانیخلی

نئچه گون ائله چیغیردیم

كی سه سیم ، سینم توتولدو

...

او ، من اولماسام یانیندا

اؤزی هئچ یئره گئده نمه ز

بو سفر نولوبدو ، من سیز

اؤزو تك قویوب گئدیبدیر ؟

...

هامیدان آجیق ائده ر كن

هامییا آجیقلی باخدیم

سونرا باشلادیم كی : منده

گئدیره م اونون دالینجا

...

دئدیلر : سنین كی تئزدیر

امامین مزاری اوسته

اوشاغی آپارماق اولماز

سن اوخی ،  قرآنی تئز چیخ

سن اونی چیخینجا بلكی

گله خان ننه سفردن

...

ته له سیك روانلاماقدا

اوخویوب قرآنی چیخدیم

كی یازیم سنه : گل ایندی

داها چیخمیشام قرآنی

منه سوقت آل گلنده

آما هر كاغاذ یازاندا

آقامین گؤزو دولاردی

سنده كی گلیب چیخمادین

نئچه ایل بو اینتظارلا

گونی ، هفته نی سایاردیم

تا یاواش – یاواش گؤز آچدیم

آنلادیم كی ، سن اؤلوبسن !

...

بیله بیلمییه هنوزدا

اوره گیمده بیر ایتیك وار

گؤزوم آختارار همیشه

نه یاماندی بو ایتیكلر

...

خان ننه جانیم ، نولیدی

سنی بیرده من تاپایدیم

او آیاقلار اوسته ، بیرده

دؤشه نیب بیر آغلایایدیم

كی داها گئده نمییه یدین

...

گئجه لر یاتاندا ، سن ده

منی قوینونا آلاردین

نئجه باغریوا باساردین

قولون اوسته گاه سالاردین

...

آجی دونیانی آتاركن

ایكیمیز شیرین یاتاردیق

یوخودا ( لولی ) آتاركن

سنی من بلشدیره ردیم

گئجه لی ، سو قیزدیراردین

اؤزووی تمیزلیه ردین

گئنه ده منی اؤپه ردین

هئچ منه آجیقلامازدین

...

ساواشان منه كیم اولسون

سن منه هاوار دوراردین

منی ، سن آنام دؤیه نده

قاپیب آرادان چیخاردین

...

ائله ایستیلیك او ایسته ك

داها كیمسه ده اولورمو ؟

اوره گیم دئییر كی : یوخ – یوخ

او ده رین صفالی ایسته ك

منیم او عزیزلیغیم تك

سنیله گئدیب ، توكندی

...

خان ننه اؤزون دئییردین

كی : بهشت ده ، الله

وئره جه ك نه ایستیور سن

بو سؤزون یادیندا قالسین

منه قولینی وئریبسه ن

...

ائله بیر گونوم اولورسا

بیلیرسن نه ایستیه رم من ؟

سؤزیمه درست قولاق وئر :

( سن ایله ن اوشاخلیق عهدین )

...

خان ننه آمان ، نولیدی

بیر اوشاخلیغی تاپایدیم

بیرده من سنه چاتایدیم

سنیلن قوجاقلاشایدیم

سنیلن بیر آغلاشایدیم

یئنیدن اوشاق اولوركن

قوجاغیندا بیر یاتایدیم

ائله بیر بهشت اولورسا

داها من اؤز الله هیمدان

باشقا بیر شئی ایسته مزدیم

 

آتا شهریار