Mənə qadan alım demə, əzizim,
Mən sənin başına dönə bilərəm.
Sənsiz qəm alovlu yanan ocağam,
Ağlama, yağışdan sönə bilərəm.

Mən Günəş gözləyən puçuram hələ,
Özüm öz dərdimdən qaçıram hələ.
Ulduzdan ulduza uçuram hələ,
Çağırsan torpağa enə bilərəm.

Qıfıl axtarıram mən açar kimi,
Imdad gözləyirəm bir naçar kimi.
Hələ ki, susuram günahkar kimi,
Bir gün üsyan edib dinə bilərəm.

Deyəsən Tanrıya yetişdi duam,
Hələ ki, cavabsız qalıbdı sual,
Küsmüsən, beləcə küsülü də qal,
Barışsan, sevincdən ölə bilərəm.

N. Kəsəmənli

منه قادان آلیم دئمه، عزیزیم،

من سنین باشینا دؤنه بیلرم.

سن‌سیز قم آلوو‌لو یانان اوجاغام،

آغلاما، یاغیش‌دان سؤنه بیلرم.

من گونش گؤزله‌ین پوچورام هله،

اؤزوم اؤز دردیم‌دن قاچیرام هله.

اولدوزدان اولدوزا اوچورام هله،

چاغیرسان تورپاغا ائنه بیلرم.

قیفیل آختاریرام من آچار كیمی،

ایمداد گؤزلییرم بیر ناچار كیمی.

هله كی، سوسورام گوناهكار كیمی،

بیر گون عصیان ائدیب دینه بیلرم.

دئیه‌سن تانرییا یئتیشدی دعام،

هله كی، جاواب‌سیز قالیبدی سوال،

كوسموسن، بئله‌جه كوسولو ده قال،

باریشسان، سئوینج‌دن اؤله بیلرم.

ن. كسمن‌لی