یاغدی یاغیشلار : بهرام اسدی

 

اللاه یارادیب

یئرده گئدن قاریشقا

قولقول  ائدن هوندوشقا

هر قیلیغی هر دونو

اللاه یارالدیب اونو

سایسان هر گئجه یاری

گؤیده كی اولدوزلاری

سایانمازسان یوخ سونو

اللاه یارالدیب اونو

گوللنیر باغچا یازدا

قیزیللانیر پاییزدا

قیشدا وار قاری-دونو

آللاه یارالدیب اونو

********************

ادبلی

سلام سلام اشاقلار

سیزه نئجه سؤزوم وار

ادبلی دیر چون ادیم

بالدان شیرین دیر دادیم

سئویرلر منی هامی

چون  وئریرم سالامی

فیرچالارام دیشیمی

قویمام قالا ایشیمی

اوست- باشیم تر- تمیز

اودوركی اولدوم عزیز.

********************

 

یاندی -   قندی

تزه درسه گئدیردیم

درسی ازبر ائدیردیم

درسه گئتمیردی سونا

قینی قینی وئردیم اونا

آنام دئدی پیس دی بو

بیر ایل سونرا گؤر اونو

سن تك دولار بوی باشا

درسه گئدرسیز قوشا

********************

خوروز

سحر واختی بیر خوروز

چیخدی دووار اوستونه

یوخوجیل اوشاخلارین

چكدی هاوار اوستونه

اویانین بسدیر یوخو

سحردیر قوققولوقو

تئز یئتر مورادینا

ائرته دوران بخته ور

هر كیم سحرلر یاتار

باخت اونا دال دؤنده ره ر

قویمایین یاتسین اونو

سحردیر قوققولوقو

باخ سیزی گؤزله ییر

باغلارداكی یئمیشلر

قاریشقا ده ن داشیییر

اویناخلاییر چپیشلر

چیخیبدیر چؤله قوزو

سحردیر قوققولوقو

بوشلا آی گؤزه ل بالام

تنبل چیلیك سؤزلرین

آچ سحره گؤزلرین

سپ اوزونه سرین سو

سحردیر قوققولوقو

********************

بالاجا قه هره مان

یوردومون بالاجا قه هره مان اوغلو

اوخو اؤز دیلینی دیلینه قوربان

بابالار ارثی دیر ائلیمیز بیزه

قورو اؤز ائلینی ائلینه قوربان

 

روحومواوخشاییر ایستی نه فه سین

آلیرام سه سینده ن كوراوغلو سه سین

یاز آنا دیلینده ائل صحیفه سین

اولوم او خیرداجا الینه قوربان

 

حیرانام او قارا كؤزونه سه نین

احساسلی فیكیرلی سؤزونه سه نین

دئیه ره م بو سؤزو اؤزونه سه نین

او چاتما قاشینا تئلینه قوربان

********************

آنا

سن منی بسله دین اؤزقوجاغیندا

شیرین لایلا دئدین گول دوداغیندا

یاتمادان گئجه نین یاری چاغیندا

چكدین كئشیییمده زحمتیم آنا

دونیادا ان بویوك نعمتیم آنا

آرخاما قوی الین الین قوربانی

آغزیما قوی دیلین دیلین قوربانی

رسمین اؤیره ت ائلین ائلین قوربانی

اونونلا قایناسین قان – اتیم آنا

دونیادا ان بویوك نعمتیم آنا

شیرین دیر سؤزلرین دوداغین آتددا

بال شكر دادی وار داماغین اتددا

قالیبدی جنت لر آیاغین آتددا

گل اوپوم آیاغین جننتیم آنا

دونیادا ان بویوك نعمتیم آنا

********************

حــــــــامام

به به ایستی دیر حــــــــامام

من گئدیرم یونام

یونان تمیز اولار

هر یئرده عزیز اولار

حامامدان قاچانلارین

كیر توتاجاق پارتارلارین

من گئدیرم حاماما

چیخام اولام شاماما

********************

یاغیشدا جوجه لر

ایلدیریم شاخدی

یاغدی سو آخدی

چیخان گؤبه لك

لاپ چوخالاجاخ

منیم اولاجاخ

آچان گول منیم

كیملر آلاجاخ

آلسا سولاجاخ

داغدا - ده ره ده

قیزاردی لاله

آخدی شلاله

حیوان جوجه لر

فیكره دولاجاخ

هاردا قالاجاخ

********************

سیچانین تویو

هایدی هایدی اوشاقلار

باخچادا تیرینگه وار

سسلنیر بؤجوك سازی

جیر جیرانیین آوازی

چكیرتگه قلیان  چكیر

ایپك قوردو دون تیكیر

خرمن قوشلاری قونور

قیزیل بوجوك نازلانیر

پیس پیسا ایله سیچانین

سیچان لا پیس پیسانین

باخچا دا تویلاریدیر

بؤیوك بیر توی واری دیر

تور آتان لار توخویور

گلینین اوزونه تور

پاپیش تیكن باشماغین

توربا بولبول پاپاغین

مینجیق قوردو گرنشیر

یئر قوردو یئری دئشیر

باش اوزادیر توسباغا

نه وار نه یوخ آی آغا

بووه گلیر آغ بیرچك

چایان اویناییر گؤیچك

قاریشقا توتور یاللی

سولوك داماغلی -حاللی

دؤرت یانا قاچ قجه له

سؤز آپار ائت عجله

سیچان دئیه ر من پاشا

قویمام بیر نفر چاشا

گیرسینلر اویناماغا

هركیم كی گلیب باغا

بیرده ن سس گلدی "میوو"

سیچان!بیر آز ساخلا توو

مستانی گؤره ر گؤرمز

گؤره ر گؤز اولدو گؤرمز

توی داغیلدی سیچان قاچ

اؤلن اؤلدو قاچان قاچ!

قالمادی بیر ائو ائشیك

سنی یاناسان پیشیك.

********************

رادیو

تاخ سیمینی آلیشسین

بور قولاغین دانیشسین

هر دیل دئسن بیلیر او

ادی رادیودور رادیو

-------------------------

تلویزیون

اچیلدی تلویزیون

گؤرسندی اوندا اویون

باخمارام من یاخیندان

چون زیان گلر اوندان

اوزاقدان باخارام من

گولرم اولارام شن

باخ بودور منیم سؤزوم

گوزلوك ایسته میر گؤزوم

********************

قار آدامی

قار یاغیبدی آغ آپباغ

پانبیقدان دا یوموشاق

ییغیلیب نئچه اوشاق

قارلی بیر قیش آخشامی

 

دیغیرلادیر قارلاری

یاشار اوزویوخاری

جومالاییر آغ قاری

سسله یه ره ك بایرامی

 

قیچلاری یوخ نه دن دی؟

قارلی بوزلو بدن دی

گؤزلری كؤموردن دی

اونو تانی ییر هامی

 

قولون آغاجدان كسین

آی اوشویورتله سین

بؤرك قویاق اوشو مه سین

بیزیم بو قار آدامی

********************

داش آتما

بو ر ئزین داش نه دیرالینده بالاش؟

قوشلاری وورماغا نه دیر بو تلاش

هئچ بولورسن هارا گئدیر داشین؟

 

داشی اویناتما اویناتما

قوشا داش آتما داش آتما

 

سئرچه نی اوولایان یامان اولماز

اووچو اولماز او قهرمان اولماز

یاغلی اولماز اونونلا بوز باشین

 

اؤزون آلداتما  آلداتما

قوشا داش آتما داش آتما

 

آتدیغین یئرلری بلد له بیر آز

ای آمان آتما داش گؤزه تله بیر آز

سیندیرارسان رفیقینین باشین

 

اونو آغلاتما آغلاتما

قوشا داش آتما داش آتما

********************

اوچاخ

گؤیده اوچاق دمیردی

دمیــــــــــــر گؤیده گلیردی

آچمیشدی قانادینی

بیلن دئســــــین آدینی

گلدی یئـرده اوتوردو

گئتــــــدی گئتــــــدی ها دوردو

دایم آچار قانادی

((اوچاق)) دیر انون ادی

********************

مكتبلی قیز

من مكـــــــــتبلی بیرقیزام

دئمیین ســــــــوادسیزام

ائویمیزده آیـــــــــــپارا

مكتبده بیر اولـــــــــــدوزام

قیرمیزی دیر جورابیم

شكیل لی دیر كیتابیم

خانیم هر نه سوروشسا

اونا واردیر جاوابیم

بیر گؤزل گؤیچك قیزام

گول قیزام چیچك قیزام

اوست باشیم تر تمیز

تئل لری ایپك قیزام

یومورو یول گئدیرم

درسی ازبر ائدیرم

اؤز مهربان آنامی

هاچان من اینجیدیرم؟

********************

الده ن توتماخ

یولدا بیر كور

گؤرموشم من

الیــــــــــــــــنه ال

وئـــــــــرمیشیم مـــن

قـــــــــیمادیم هـــئچ

او دایــــــــــــــانا

اپاردیــــــــــــم تئــــــــز

من    اویـــــــــــانا

سئـــــــــوینیب او

شــــاد اولـــــدی بـــــاخ

دئـــــدی ســــنی

ساخـــــــلاسین حاق

********************

یاغــــدی یاغـیشلار

گؤی گورولدادی

ایلدیرم شاخدی

یاغدی سو آخدی

آغ بولودلاردان

یاغدی یاغشلار

با نلادی  قوش لار

گول لو باغچادا

اوخودو بولبول

آچیلدی بیر گول

سحردن بری

یاغیش یاغیب پیس

ایسلانمیشیق بیز

اوشاقلار گولون

جیب لر دولاجاق

بایرام اولاجاق

********************

 

 

 

عیب

من نه كارا نه كورا

نه كچله چوپورا

هئچ كیمه عیب ائتمرم

هئچ كیمی اینجیتمرم

چون منه اتام دئییب

هئچ كیمه توتما عیب

عیب توتماق عیب دیر

عیبی او پیس دئییبدیر

********************

معللیم

بالاجا اوغلانیدیم

ائویمیزده خان ایدیم

آلتی یاشیم بیتنده

مكتب واختی یئتنده

آتام منه كیف آلدی

منی یانینا سالدی

آپاردی مدرسه یه

آدیمی یازسین دئیه

آدیم كئچدی دفتره

باخیردیم قلملره

بیلمیردیم نه دیر یازی

نئجه یازیم كاغاذی

نئچه واخت گئددیم اورا

قول قویدوم كاغاذلارا

یازینی بیلدیم داحی

شوكر ائله دیم آللاهی

آدیمی یازا بیله یدیم

یازینی پوزابیله یدیم

بونو كیم اؤیره تدی كیم

محببت لی معللیم

********************

اوش چیراخ

بیز بو شهرین

اوغلانی قیزی

تانیریق یاشیل

ساری قیرمزی

هر خیابانین

باشینا باخاق

گؤره ریك اوردا

اوچ دانا چیراق

یاشیل یاناندا

یولدان كئچیریك

بواوچ چیراقدان

اونو سئچریك

ساری چراغی

گؤرنده تیز تیز

بو خیابانی

بشالداریق بیز

تیز دایاناریق

گؤرسك اوزاقدان

چونكی قورخوروق

قیرمز چراقدان

********************

كوسمك

هر گون آخشام اوشاخ تك

كوسوب گئدیر بو گونش

اوفوق لاردا عالمین

تركین ائدیر بو گونش

هر گون سحر اوتانجاق

داغدان بویلانیر گونش

دوننكی كوسدویونده ن

سانكی اوتانیر گونش

اوتاندیقجا قیزاریر

بویلانیر ائمیل – ائمیل

كوسمه آی گونش داهی

كوسمك خوش صنعت دییل

********************

ساحات

ها توولانیر تولانیر

فیر فیرا تك فیرلانیر

توولاماسی اوچدو اوچ

دئمه ایشی پوچدو پوچ

بؤیوك  گئدیر آستا جا

خیردا گئدیر اوستاجا

ها یول گئدیر یول گئدیر

دولانباجی سئیر ائدیر

اؤز باشینا دولانیر

نه بئزیر نه اوسانیر

یاتانلاری اویاتدی

ساحاتدیر او ساحاتدیر

********************

 

 

 

 

 

 

 

 

 

 

 

 

حب الوطن

گونلرین بیر گونونده

یازا یاخین بیر گونده

گؤی بیر چمن واریدی

اوردا بیر,,ده ن,, واریدی

دن اوز دوتدو چمنه

دئدی قولاغ آس منه

یوردوموزا یاز گلیر

مین نغمه آواز گلیر

یوخ خبرین خبرده ن

قوشلار گلیر سفرده ن

چمن سوروشدو ده ن ده ن

بیر سؤز سوروشدوم سنده ن

ایندیكی دویغون نه دیر؟

یازداكی آرزین نه دیر؟

ده ن دئدی آرزوم بودور

بو منده بیر آرزودور

منده بیر قوش اولایدیم

گؤیده قاناد چالایدیم

بوردا یئریم یاشدی یاش

تورپاخدیر منه یولداش

گؤیده اوچا بیله یدیم

قاناد آچا بیله یدیم

بو واخ بیر آلا قارقا

چمنلیكلره دارقا

ده نی آلدی دیمدییه

ده نله ییب اوچدو گؤیه

اوجالدی گؤیلره ده ن

باخیردی آونا چمن

اوچدو آسمانیندا

قارقا چینه دانیندا

چمن حسرتین یئدی

بیر دؤنوب بئله دئدی

بیر واخ وطن یاش اولار

بیر واخ دولی داش اولار

تورپاغ اولار كول اولار

بیر واخ چیچك گول اولار

تورپاخدان اوزوله ن لر

اولماز اوزو گولن لر

تورپاخدا كؤك سالانلار

اولدو بوردا قالانلار

مه حو اولمازایدی او ده ن

بیلسه ایدی حب الوطن

********************

آتا جان

آتا جان بو ائوین باهاریسان سن

قلبیمین ان عزیز نیگاریسان سن

ائوین یاراشیغی اویاریسان سن

بو سؤزده گؤرموره م ذره جه خطا

گؤیلومون ایسته یی سن سن آی آتا

 

قوربانام او تمیز آری قلبیوه

سالیبدیر رحمتین تاری قلبیوه

صفا ایله دولو دورو قلبیوه

مئحنتی نه گه ره  ك آددیمین آتا

گؤیلومون ایسته یی سن سن آی آتا

 

گؤنول اونوتماییب سنین عشقینی

آتا جان آتماییب سنین عشقینی

اؤزگه یه قاتماییب سنین عشقینی

اولارمی عشقیده ن بو بالان آتا

گؤیلومون ایسته یی سن سن آی آتا

********************

آنامین سؤزلری

آنام منه بئشیییمده

بیر اینجی بیر دوور دئییبدی

ظالملارین سؤزلرینده ن

بوینونو سن بور دئییبدی

نه قه دهر زوربا اولا

قاباغیندا دور دئییبدی

عدالتی یئر اوزونده

گؤز- به به ییم قور دئییبدی

زور دئییه نین ته په سینده ن

وار گوجویله وور دئییبدی

اوزاخ یوللار یاخین اولار

مین آتینی سور دئییبدی

دؤنه-دؤنه آنام منه

نه ننیده بو جور دئییبدی

دوسلوغیله مه حه ببتی

اوره كلره نور دئییبدی

********************

 

 

 

 

 

 

 

 

 

 

 

 

 

 

قیزیم

قولاغ آس دینله منی

آتادان كوسمه قیزیم

آتانین سؤزلرینه

بورنونو قیسما قیزیم

 

آزریستان قیزی سان

گولشه نیمین یازیسان

ائویمین اولدوزوسان

تانیش اول رسمه قیزیم

 

مثل اول متانه ته

ده یه ر اول له یاقه ته

هر ائوه هر حه یه ته

آیاغین باسما قیزیم

 

گودمه چوخ ایپ اوجونو

كوچه نین توخ-آجینی

بوشلاییب ایش – گوجونو

قاپینی كسمه قیزیم

 

حیاوی قات حایاما

سه سینی هئچ قووزاما

حاخ باتان یئرده آما

نعره چه ك سوسما قیزیم

********************

 

 

قاتار

بورولور ایلان كیمی

نه سویو وار نه یئمی

سیقنالی وار اوو – اوو

یول گئتمه یه دووها دوو

ته په لرده ن یئل كیمی

ده ره لرده ن سئل كیمی

كئده ر مقصه ده چاتار

آدین ایسته سه ن ,قاتار

********************

كوفلان

كوفلانیمی قورموشام

كوفلان دا اوتورموشام

ییرقالانیرام خوشجا

اوخویورام یاواش جا

ییرقالان  ها ییرقالان

تنبل دیر یئرده قالان

قوی ایپیندن آسلانیم

ییخما منی كوفلانیم

********************

فاطما قیزیم دو چای قوی

ائممیزی سوپور ناهار قوی

من بو چایی ایشمه ره م

دروازه ده ن گئشمه ره م

دروازه منیم اولسون

ایپك تومانیم اولسون

گیییم گئدیم مكه یه

مكه ده تویوم اولسون

قیزلار گلسین تویوما

قوربان اولسون بویوما

 

********************