Getmə tərsa balası

Izn ver toy gecəsi məndə sənə dayə gəlim

əl qatanda sənə moşşatə təmaşatə gəlim

sən bu məhtab gecəsi seyrə çıxan bir sər ol

izn ver məndə dalınca sürünüb sayə gəlim

mənədə baxdın o şəhla gözulə mən qara gün

cur,ətim olmadı bir kəlmə təmənnatə gəlim

mən cəhənnəmdədə baş yasdığa qoysam sənilə

heç ayılmam ki durub cənnəti mə,vayə gəlim

nənə qarnındada sənlə ekiz olseydim əyər

istəməzdim doğulub birdə bu dünyayə gəlim

sən tatıb cənnəti röyadə görəndə gecələr

məndə cənnətdə quş ollam ki o röyayə gəlim

qıtlığ illər yağışı tək quruyub göz yaşımız

kuye eşqində gərək birdə müsəllayə gəlim

səndə səhrayə marallar kimi bir çıx noli ki

məndə bir seydə çıxanlar kimi səhrayə gəlim

allahından sən əyər qorxmuyub olsan tərsa

qorxuram məndə dönüb dine məsihayə gəlim

ŞEYXI SƏN,AN kimi donquz otarıb illərcə

Səni bir görməy üçün mə,bədi tərsayə gəlim

Yox sənəm anlamadım anlamadım haşa mən

Bıraxım məscidimi sənlə klisayə gəlim

Gəl çıxax turetəcəllayə sən ol celveyi tur

Məndə musa kimi o , ture təcəllayə gəlim

Şiridir şəhriyarın şe,ri əlində şəmşir

Kim deyir mən belə bir şirilə də,vayə gəlim

Ata shehryar

گئتمه ترسا بالاسی

اذن وئر توی گئجه سی من ده سنه دایه گلیم

ال قاتاندا سنه مشاطه ، تماشایه گلیم

سن بو مهتاب گئجه سی سئیره چیخان بیر سرو اول

اذن وئر ، من ده دالینجا سورونوب سایه گلیم

منه ده باخدین او شهلا گوزونله ، من قارا گون

جرئتیم اولمادی بیر كلمه تمنایه گلیم

من جهنم ده ده باش یاسدیقا قویسام سنیله

هئچ آییلمام كی دوروب جنت مآوایه گلیم

ننه قارنیندادا سنله آكیز اولسیدیم اگر

ایسته مزدیم دوغولوب بیرده بو دونیایه گلیم

سن یاتیب جنتی رؤیاده گؤرنده گئجه لر

من ده جنتده قوش اوللام ، كی او رؤیایه گلیم

قیتلیغ ایللر یاغشی تك قورویوب گؤز یاشیمیز

كوی عشقینده گرك بیرده مصلایه گلیم

سن ده صحرایه مارال لار كیمی بیر چیخ ، نولی كی

من ده بیر صیده چیخانلار كیمی ، صحرایه گلیم

آللاهیندان سن اگر قورخموییب ، اولسان ترسا

قورخورام من ده دؤنوب دین مسیحایه گلیم

شیخ صنعان كیمی دونقوز اوتاریب ایللرجه

سنی بیر گؤرمك اچون معبد ترسایه گلیم

یوخ صنم! آنلامادیم ، آنلامادیم ، حاشا من

بوراخیم مسجیدیمی ، سنله كلیسایه گلیم!

گل چیخاق طور تجلایه ، سن اول جلوه ی طور

من ده موسی كیمی ، او طوره تجلایه گلیم

شیردیر (( شهریار )) ین شعری ، الینده شمشیر

كیم دئیه ر من بئله بیر شیرله دعوایه گلیم

آتـــا شهریار