حیدر بابا

حیدر بابایا بیر سلام

(١ )

حیدربابا ، ایلدیریملار شاخاندا

سئللر ، سولار ، شاققیلدییوب آخاندا

قیزلار اوْنا صف باغلییوب باخاندا

سلام اولسون شوْكتوْزه ، ائلوْزه !

منیم دا بیر آدیم گلسین دیلوْزه

(٢)

حیدربابا ، كهلیك لروْن اوچاندا

كوْل دیبینَّن دوْشان قالخوب ، قاچاندا

باخچالارون چیچكلنوْب ، آچاندا

بیزدن ده بیر موْمكوْن اوْلسا یاد ائله

آچیلمیان اوْركلرى شاد ائله

(٣)

بایرام یئلى چارداخلارى ییخاندا

نوْروز گوْلى ، قارچیچكى ، چیخاندا

آغ بولوتلار كؤینكلرین سیخاندا

بیزدن ده بیر یاد ائلییه ن ساغ اوْلسون

دردلریمیز قوْى دیّكلسین ، داغ اوْلسون

(٤)

حیدربابا ، گوْن دالووى داغلاسین !

اوْزوْن گوْلسوْن ، بولاخلارون آغلاسین !

اوشاخلارون بیر دسته گوْل باغلاسین !

یئل گلنده ، وئر گتیرسین بویانا

بلكه منیم یاتمیش بختیم اوْیانا

(٥)

حیدربابا ،‌ سنوْن اوْزوْن آغ اوْلسون !

دؤرت بیر یانون بولاغ اوْلسون باغ اوْلسون !

بیزدن سوْرا سنوْن باشون ساغ اوْلسون !

دوْنیا قضوْ-قدر ، اؤلوْم-ایتیمدى

دوْنیا بوْیى اوْغولسوزدى ، یئتیمدى

(6)

حیدربابا ، یوْلوم سنَّن كج اوْلدى

عؤمروْم كئچدى ، گلممه دیم ، گئج اوْلدى

هئچ بیلمه دیم گؤزللروْن نئج اوْلدى

بیلمزیدیم دؤنگه لر وار ،‌ دؤنوْم وار

ایتگین لیك وار ، آیریلیق وار ، اوْلوْم وار

(7)

حیدربابا ، ایگیت اَمَك ایتیرمز

عؤموْر كئچر ، افسوس بَرَه بیتیرمز

نامرد اوْلان عؤمرى باشا یئتیرمز

بیزده ، واللاه ، اونوتماریق سیزلرى

گؤرنمسك حلال ائدوْن بیزلرى

(8)

حیدربابا ، میراژدر سَسلننده

كَند ایچینه سسدن - كوْیدن دوْشنده

عاشیق رستم سازین دیللندیرنده

یادوندادى نه هؤلَسَك قاچاردیم

قوشلار تكین قاناد آچیب اوچاردیم

(9)

شنگیل آوا یوردى ، عاشیق آلماسى

گاهدان گئدوب ، اوْردا قوْناق قالماسى

داش آتماسى ، آلما ،‌ هیوا سالماسى

قالیب شیرین یوخى كیمین یادیمدا

اثر قویوب روحومدا ، هر زادیمدا

(10)

حیدربابا ، قورى گؤلوْن قازلارى

گدیكلرین سازاخ چالان سازلارى

كَت كؤشنین پاییزلارى ، یازلارى

بیر سینما پرده سى دیر گؤزوْمده

تك اوْتوروب ، سئیر ائده رم اؤزوْمده

(11)

حیدربابا ،‌ قره چمن جاداسى

چْووشلارین گَلَر سسى ، صداسى

كربلیا گئدنلرین قاداسى

دوْشسون بو آج یوْلسوزلارین گؤزوْنه

تمدّونون اویدوخ یالان سؤزوْنه

(12)

حیدربابا ، شیطان بیزى آزدیریب

محبتى اوْركلردن قازدیریب

قره گوْنوْن سرنوشتین یازدیریب

سالیب خلقى بیر-بیرینن جانینا

باریشیغى بلشدیریب قانینا

(13)

گؤز یاشینا باخان اوْلسا ، قان آخماز

انسان اوْلان بئلینه تاخماز

آمما حئییف كوْر توتدوغون بوراخماز

بهشتیمیز جهنّم اوْلماقدادیر !

ذى حجّه میز محرّم اوْلماقدادیر

 

(14)

خزان یئلى یارپاخلارى تؤكنده

بولوت داغدان یئنیب ، كنده چؤكنده

شیخ الاسلام گؤزل سسین چكنده

نیسگیللى سؤز اوْركلره دَیَردى

آغاشلار دا آللاها باش اَیَردى

(15)

داشلى بولاخ داش-قومونان دوْلماسین !

باخچالارى سارالماسین ، سوْلماسین !

اوْردان كئچن آتلى سوسوز اولماسین !

دینه : بولاخ ، خیرون اوْلسون آخارسان

افقلره خُمار-خُمار باخارسان

(16)

حیدر بابا ، داغین ، داشین ، سره سى

كهلیك اوْخور ، دالیسیندا فره سى

قوزولارین آغى ، بوْزى ، قره سى

بیر گئدیدیم داغ-دره لر اوزونى

اوْخویئدیم‌ : « چوْبان ، قیتر قوزونى »

(17)

حیدر بابا ، سولى یئرین دوْزوْنده

بولاخ قئنیر چاى چمنین گؤزونده

بولاغ اوْتى اوْزَر سویون اوْزوْنده

گؤزل قوشلار اوْردان گلیب ، گئچللر

خلوتلیوْب ، بولاخدان سو ایچللر

(18)

بیچین اوْستى ، سونبول بیچن اوْراخلار

ایله بیل كى ، زوْلفى دارار داراخلار

شكارچیلار بیلدیرچینى سوْراخلار

بیچین چیلر آیرانلارین ایچللر

بیرهوشلانیب ، سوْننان دوروب ، بیچللر

(19)

حیدربابا ، كندین گوْنى باتاندا

اوشاقلارون شامین ئییوب ، یاتاندا

آى بولوتدان چیخوب ، قاش-گؤز آتاندا

بیزدن ده بیر سن اوْنلارا قصّه ده

قصّه میزده چوخلى غم و غصّه ده

(20)

قارى ننه گئجه ناغیل دییَنده

كوْلك قالخیب ، قاپ-باجانى دؤیَنده

قورد گئچینین شنگوْلوْسون یینده

من قاییدیب ، بیرده اوشاق اوْلئیدیم

بیر گوْل آچیب ، اوْندان سوْرا سوْلئیدیم

(21)

عمّه جانین بال بلله سین ییه ردیم

سوْننان دوروب ، اوْس دوْنومى گییه ردیم

باخچالاردا تیرینگَنى دییه ردیم

آى اؤزومى اوْ ازدیرن گوْنلریم !

آغاج مینیپ ، آت گزدیرن گوْنلریم !

(22)

هَچى خالا چایدا پالتار یوواردى

مَمَد صادق داملارینى سوواردى

هئچ بیلمزدیك داغدى ، داشدى ، دوواردى

هریان گلدى شیلاغ آتیب ، آشاردیق

آللاه ، نه خوْش غمسیز-غمسیز یاشاردیق

(23)

شیخ الاسلام مُناجاتى دییه ردى

مَشَدرحیم لبّاده نى گییه ردى

مشْدآجلى بوْز باشلارى ییه ردى

بیز خوْشودوق خیرات اوْلسون ، توْى اوْلسون

فرق ائلَمَز ، هر نوْلاجاق ، قوْى اولسون

(24)

ملك نیاز ورندیلین سالاردى

آتین چاپوپ قئیقاجیدان چالاردى

قیرقى تكین گدیك باشین آلاردى

دوْلائیا قیزلار آچیپ پنجره

پنجره لرده نه گؤزل منظره !

(25)

حیدربابا ، كندین توْیون توتاندا

قیز-گلینلر ، حنا-پیلته ساتاندا

بیگ گلینه دامنان آلما آتاندا

منیم ده اوْ قیزلاروندا گؤزوم وار

عاشیقلارین سازلاریندا سؤزوم وار

(26)

حیدربابا ، بولاخلارین یارپیزى

بوْستانلارین گوْل بَسَرى ، قارپیزى

چرچیلرین آغ ناباتى ، ساققیزى

ایندى ده وار داماغیمدا ، داد وئرر

ایتگین گئدن گوْنلریمدن یاد وئرر

(27)

بایرامیدى ، گئجه قوشى اوخوردى

آداخلى قیز ، بیگ جوْرابى توْخوردى

هركس شالین بیر باجادان سوْخوردى

آى نه گؤزل قایدادى شال ساللاماق !

بیگ شالینا بایراملیغین باغلاماق !

(28)

شال ایسته دیم منده ائوده آغلادیم

بیر شال آلیب ، تئز بئلیمه باغلادیم

غلام گیله قاشدیم ، شالى ساللادیم

فاطمه خالا منه جوراب باغلادى

خان ننه مى یادا سالیب ، آغلادى

(29)

حیدربابا ، میرزَممدین باخچاسى

باخچالارین تورشا-شیرین آلچاسى

گلینلرین دوْزمه لرى ، طاخچاسى

هى دوْزوْلر گؤزلریمین رفینده

خیمه وورار خاطره لر صفینده

(30)

بایرام اوْلوب ، قیزیل پالچیق اَزَللر

ناققیش ووروب ، اوتاقلارى بَزَلل

رطاخچالارا دوْزمه لرى دوْزللر

قیز-گلینین فندقچاسى ، حناسى

هَوَسله نر آناسى ، قایناناسى

(31)

باكى چى نین سؤزى ، سوْوى ، كاغیذى

اینكلرین بولاماسى ، آغوزى

چرشنبه نین گیردكانى ، مویزى

قیزلار دییه ر : « آتیل ماتیل چرشنبه

آینا تكین بختیم آچیل چرشنبه »

(32)

یومورتانى گؤیچك ، گوللى بوْیاردیق

چاققیشدیریب ، سینانلارین سوْیاردیق

اوْیناماقدان بیرجه مگر دوْیاردیق ؟

على منه یاشیل آشیق وئرردى

ارضا منه نوروزگوْلى درردى

(33)

نوْروز على خرمنده وَل سوْرردى

گاهدان یئنوب ، كوْلشلرى كوْرردى

داغدان دا بیر چوْبان ایتى هوْرردى

اوندا ، گؤردن ، اولاخ ایاخ ساخلادى

داغا باخیب ، قولاخلارین شاخلادى

(34)

آخشام باشى ناخیرینان گلنده

قوْدوخلارى چكیب ، وورادیق بنده

ناخیر گئچیب ، گئدیب ، یئتنده كنده

حیوانلارى چیلپاق مینیب ، قوْواردیق

سؤز چیخسایدى ، سینه گریب ، سوْواردیق

(35)

یاز گئجه سى چایدا سولار شاریلدار

داش-قَیه لر سئلده آشیب خاریلدار

قارانلیقدا قوردون گؤزى پاریلدار

ایتلر ، گؤردوْن ، قوردى سئچیب ، اولاشدى

قورددا ، گؤردوْن ، قالخیب ، گدیكدن آشدى

(36)

قیش گئجه سى طؤله لرین اوْتاغى

كتلیلرین اوْتوراغى ، یاتاغى

بوخاریدا یانار اوْتون یاناغى

شبچره سى ، گیردكانى ، ایده سى

كنده باسار گوْلوْب - دانیشماق سسى

(37)

شجاع خال اوْغلونون باكى سوْقتى

دامدا قوران سماوارى ، صحبتى

یادیمدادى شسلى قدى ، قامتى

جؤنممه گین توْیى دؤندى ، یاس اوْلدى

ننه قیزین بخت آیناسى كاس اوْلدى

(38)

حیدربابا ، ننه قیزین گؤزلرى

رخشنده نین شیرین-شیرین سؤزلرى

تركى دئدیم اوْخوسونلار اؤزلرى

بیلسینلر كى ، آدام گئدر ، آد قالار

یاخشى-پیسدن آغیزدا بیر داد قالار

(39)

یاز قاباغى گوْن گوْنئیى دؤیَنده

كند اوشاغى قار گوْلله سین سؤیَنده

كوْركچى لر داغدا كوْرك زوْیَنده

منیم روحوم ، ایله بیلوْن اوْردادور

كهلیك كیمین باتیب ، قالیب ، قاردادور

(40)

قارى ننه اوزاداندا ایشینى

گوْن بولوتدا اَییرردى تشینى

قورد قوْجالیب ، چكدیرنده دیشینى

سوْرى قالخیب ، دوْلائیدان آشاردى

بایدالارین سوْتى آشیب ، داشاردى

(41)

خجّه سلطان عمّه دیشین قیساردى

ملا باقر عم اوغلى تئز میساردى

تندیر یانیب ، توْسسى ائوى باساردى

چایدانیمیز ارسین اوْسته قایناردى

قوْورقامیز ساج ایچینده اوْیناردى

(42)

بوْستان پوْزوب ، گتیرردیك آشاغى

دوْلدوریردیق ائوده تاختا-طاباغى

تندیرلرده پیشیرردیك قاباغى

اؤزوْن ئییوْب ، توخوملارین چیتداردیق

چوْخ یئمكدن ، لاپ آز قالا چاتداردیق

(43)

ورزغان نان آرموت ساتان گلنده

اوشاقلارین سسى دوْشردى كنده

بیزده بویاننان ائشیدیب ، بیلنده

شیللاق آتیب ، بیر قیشقریق سالاردیق

بوغدا وئریب ، آرموتلاردان آلاردیق

(44)

میرزاتاغى نان گئجه گئتدیك چایا

من باخیرام سئلده بوْغولموش آیا

بیردن ایشیق دوْشدى اوْتاى باخچایا

اى واى دئدیك قورددى ، قئیتدیك قاشدیق

هئچ بیلمه دیك نه وقت كوْللوكدن آشدیق

(45)

حیدربابا ، آغاجلارون اوجالدى

آمما حئییف ، جوانلارون قوْجالدى

توْخلیلارون آریخلییب ، آجالدى

كؤلگه دؤندى ، گوْن باتدى ، قاش قَرَلدى

قوردون گؤزى قارانلیقدا بَرَلدى

(46)

ائشیتمیشم یانیر آللاه چیراغى

دایر اوْلوب مسجدیزوْن بولاغى

راحت اوْلوب كندین ائوى ، اوشاغى

منصورخانین الی-قوْلى وار اوْلسون

هاردا قالسا ، آللاه اوْنا یار اوْلسون

(47)

حیدربابا ، ملا ابراهیم وار ، یا یوْخ ؟

مكتب آچار ، اوْخور اوشاقلار ، یا یوْخ ؟

خرمن اوْستى مكتبى باغلار ،‌ یا یوْخ ؟

مندن آخوندا یتیررسن سلام

ادبلى بیر سلامِ مالاكلام

(48)

خجّه سلطان عمّه گئدیب تبریزه

آمما ، نه تبریز ، كى گلممیر بیزه

بالام ، دورون قوْیاخ گئداخ ائممیزه

آقا اؤلدى ، تو فاقیمیز داغیلدى

قوْیون اوْلان ، یاد گئدوْبَن ساغیلدى

(49)

حیدربابا ، دوْنیا یالان دوْنیادى

سلیماننان ، نوحدان قالان دوْنیادى

اوغول دوْغان ، درده سالان دوْنیادى

هر كیمسَیه هر نه وئریب ، آلیبدى

افلاطوننان بیر قورى آد قالیبدى

(50)

حیدربابا ، یار و یولداش دؤندوْلر

بیر-بیر منى چؤلده قوْیوب ، چؤندوْلر

چشمه لریم ، چیراخلاریم ، سؤندوْلر

یامان یئرده گؤن دؤندى ، آخشام اوْلدى

دوْنیا منه خرابه شام اوْلدى

(51)

عم اوْغلینان گئدن گئجه قیپچاغا

آى كى چیخدى ، آتلار گلدى اوْیناغا

دیرماشیردیق ، داغلان آشیردیق داغا

مش ممى خان گؤى آتینى اوْیناتدى

تفنگینى آشیردى ، شاققیلداتدى

(52)

حیدربابا ، قره كوْلون دره سى

خشگنابین یوْلى ، بندى ، بره سى

اوْردا دوْشَر چیل كهلیگین فره سى

اوْردان گئچر یوردوموزون اؤزوْنه

بیزده گئچك یوردوموزون سؤزوْنه

(53)

خشگنابى یامان گوْنه كیم سالیب ؟

سیدلردن كیم قیریلیب ، كیم قالیب ؟

آمیرغفار دام-داشینى كیم آلیب ؟

بولاخ گنه گلیب ، گؤلى دوْلدورور ؟

یاقورویوب ، باخچالارى سوْلدورور ؟

(54)

آمیر غفار سیدلرین تاجییدى

شاهلار شكار ائتمه سى قیقاجییدى

مَرده شیرین ، نامرده چوْخ آجییدى

مظلوملارین حقّى اوْسته اَسَردى

ظالم لرى قیلیش تكین كَسَردى

(55)

میر مصطفا دایى ، اوجابوْى بابا

هیكللى ،ساققاللى ، توْلستوْى بابا

ائیلردى یاس مجلسینى توْى بابا

خشگنابین آبروسى ، اَردَمى

مسجدلرین ، مجلسلرین گؤركَمى

(56)

مجدالسّادات گوْلردى باغلاركیمى

گوْروْلدردى بولوتلى داغلاركیمى

سؤز آغزیندا اریردى یاغلاركیمى

آلنى آچیق ، یاخشى درین قاناردى

یاشیل گؤزلر چیراغ تكین یاناردى

(57)

منیم آتام سفره لى بیر كیشییدى

ائل الیندن توتماق اوْنون ایشییدى

گؤزللرین آخره قالمیشییدى

اوْننان سوْرا دؤنرگه لر دؤنوْبلر

محبّتین چیراخلارى سؤنوْبلر

(58)

میرصالحین دلى سوْلوق ائتمه سى

میر عزیزین شیرین شاخسِى گئتمه سى

میرممّدین قورولماسى ، بیتمه سى

ایندى دئسك ، احوالاتدى ، ناغیلدى

گئچدى ، گئتدى ، ایتدى ، باتدى ، داغیلدى

(59)

میر عبدوْلوْن آیناداقاش یاخماسى

جؤجیلریندن قاشینین آخماسى

بوْیلانماسى ، دام-دوواردان باخماسى

شاه عبّاسین دوْربوْنى ، یادش بخیر !

خشگنابین خوْش گوْنى ، یادش بخیر !

(60)

ستاره عمّه نزیك لرى یاپاردى

میرقادر ده ، هر دم بیرین قاپاردى

قاپیپ ، یئیوْب ، دایچاتكین چاپاردى

گوْلمه لیدى اوْنون نزیك قاپپاسى

عمّه مینده ارسینینین شاپپاسى

(61)

حیدربابا ، آمیر حیدر نئینیوْر ؟

یقین گنه سماوارى قئینیوْر

داى قوْجالیب ، آلت انگینن چئینیوْر

قولاخ باتیب ، گؤزى گیریب قاشینا

یازیق عمّه ، هاوا گلیب باشینا

(62)

خانم عمّه میرعبدوْلوْن سؤزوْنى

ائشیدنده ، ایه ر آغز-گؤزوْنى

مَلْكامِدا وئرر اوْنون اؤزوْنى

دعوالارین شوخلوغیلان قاتاللار

اتى یئیوْب ، باشى آتیب ، یاتاللار

(63)

فضّه خانم خشگنابین گوْلییدى

آمیریحیا عمقزینون قولییدى

رُخساره آرتیستیدى ، سؤگوْلییدى

سیّد حسین ، میر صالحى یانسیلار

آمیرجعفر غیرتلى دیر ، قان سالار

(64)

سحر تئزدن ناخیرچیلار گَلَردى

قوْیون-قوزى دام باجادا مَلَردى

عمّه جانیم كؤرپه لرین بَلَردى

تندیرلرین قوْزاناردى توْسیسى

چؤركلرین گؤزل اییى ، ایسیسى

(65)

گؤیرچینلر دسته قالخیب ، اوچاللار

گوْن ساچاندا ، قیزیل پرده آچاللار

قیزیل پرده آچیب ، ییغیب ، قاچاللار

گوْن اوجالیب ، آرتارداغین جلالى

طبیعتین جوانلانار جمالى

(66)

حیدربابا ، قارلى داغلار آشاندا

گئجه كروان یوْلون آزیب ، چاشاندا

من هارداسام ، تهراندا یا كاشاندا

اوزاقلاردان گؤزوم سئچر اوْنلارى

خیال گلیب ، آشیب ، گئچر اوْنلارى

(67)

بیر چیخئیدیم دام قیه نین داشینا

بیر باخئیدیم گئچمیشینه ، یاشینا

بیر گورئیدیم نه لر گلمیش باشینا

منده اْونون قارلاریلان آغلاردیم

قیش دوْندوران اوْركلرى داغلاردیم

(68)

حیدربابا ، گوْل غنچه سى خنداندى

آمما حئیف ، اوْرك غذاسى قاندى

زندگانلیق بیر قارانلیق زینداندى

بو زیندانین دربچه سین آچان یوْخ

بو دارلیقدان بیرقورتولوب ، قاچان یوْخ

(69)

حیدربابا گؤیلر بوْتوْن دوماندى

گونلریمیز بیر-بیریندن یاماندى

بیر-بیروْزدن آیریلمایون ، آماندى

یاخشیلیغى الیمیزدن آلیبلار

یاخشى بیزى یامان گوْنه سالیبلار

(70)

بیر سوْروشون بو قارقینمیش فلكدن

نه ایستیوْر بو قوردوغى كلكدن ؟

دینه گئچیرت اولدوزلارى الكدن

قوْى تؤكوْلسوْن ، بو یئر اوْزى داغیلسین

بو شیطانلیق قورقوسى بیر ییغیلسین

(71)

بیر اوچئیدیم بو چیرپینان یئلینن

باغلاشئیدیم داغدان آشان سئلینن

آغلاشئیدیم اوزاق دوْشَن ائلینن

بیر گؤرئیدیم آیریلیغى كیم سالدى

اؤلكه میزده كیم قیریلدى ، كیم قالدى

(72)

من سنون تك داغا سالدیم نَفَسى

سنده قئیتر ، گوْیلره سال بوسَسى

بایقوشوندا دار اوْلماسین قفسى

بوردا بیر شئر داردا قالیب ، باغیریر

مروّت سیز انسانلارى چاغیریر

(73)

حیدربابا ، غیرت قانون قایناركن

قره قوشلار سنَّن قوْپوپ ، قالخاركن

اوْ سیلدیریم داشلارینان اوْیناركن

قوْزان ، منیم همّتیمى اوْردا گؤر

اوردان اَییل ، قامتیمى داردا گؤر

(74)

حیدربابا . گئجه دورنا گئچنده

كوْراوْغلونون گؤزى قارا سئچنده

قیر آتینى مینیب ، كسیب ، بیچنده

منده بوردان تئز مطلبه چاتمارام

ایوز گلیب ، چاتمیونجان یاتمارام(75)

حیدربابا ، مرد اوْغوللار دوْغگینان

نامردلرین بورونلارین اوْغگینان

گدیكلرده قوردلارى توت ، بوْغگینان

قوْى قوزولار آیین-شایین اوْتلاسین

قوْیونلارون قویروقلارین قاتلاسین

(76)

حیدربابا ، سنوْن گؤیلوْن شاد اوْلسون

دوْنیا واركن ، آغزون دوْلى داد اوْلسون

سنَّن گئچن تانیش اوْلسون ، یاد اوْلسون

دینه منیم شاعر اوْغلوم شهریار

بیر عمر دوْر غم اوْستوْنه غم قالار

 

(۱) حیدربابا گلدیم سنى یوخلیام
بیر ده یاتام قوجاغوندا یوخلیام
عمرى قوام بلكه بوردا حاخلیام
اوشاقلیغا دیم بیزه گلسن بیر
ایدین گونلر آغلار یوزه گلسن بیر

(۲) حیدربابا چكدون منى گتیردون
یوردوموزا، یوامیزا یتیردون
یوسفوى اوشاق ایكن ایتیردون
قوجا یعقوب ایتمیشسمده تاپوپسان
قاوالیوب قورد آغزینان قاپوپسان

(۳) گدنلرین یرى بوردا، گورونور
خانم ننم آغ كقنین بورونور
دالیمجادور، هارا گدیم سورونور
بالا گلدون؟ نیه بله گژ گلدون
صبریم سنن گلشدى سن گوژ گلدون

(۴) من گوردوگوم كروان چاتوپ كچپدى
آیریلیغن شربتنى ایچیپدى
عمرموزون كچى بوردان گچیپدى
گچیپ گدیپ گدر گلمز یولارا
توزى قونوپ بو داشلارا كولارا

(۵) بوردا شیرین خاطرهلر یاتوپلار
داشلاریلان باشى باشا چاتوپلار
آشنالیغین داشین بیزدن آتوپلار
من باخاندا قاوزایلار باخیلار
بیرده یاتوپ یاندریلار یاخیلار

(۶) قبیله میز بوردا قوروپ اجاغى
ایندى اولموش قورد قوشلارون یاتاغى
گون باتاندا سونر بوتون چراغى
و بلدة لیس لها انیس
الا الیعافیر و الا العیس

(۷) زمان گچیر افق لرده توز قالیر
كروان كیمى اوزاقلاردا توز سالیر
دومان گلیر یوركلرى چولقلیر
یورك دیر زمان كچمه، آمان دور
كچنلرده گوزوم وار بیر دایاندور

(۸) روزگارین دگرمانى فیرلانیر
مخلوق اونون دیشلرینه تولانیر
باخ كه گنه بشر نجه آلانیر
همیشه لیك شادلیق اومور اوزینه
قبرى گورور توز قوندورمور یوزینه

(۹) كهنه لرین سور سموكى دارتلوپ
قورتولانون چول چوخاسى یرتلوپ
ملا ابراهیم لاپ اریوب قورتلوپ
شیخ الاسلام سهمان قالوپ قبراخدى
نوروز على قاچاق گچیپ قوچاخدى

(۱۰) عاهیلارون یتمش كفن چورودوپ
جاهیلارى دنیا غمى كریدوپ
قیز گلینلر ات جانلارى اریدوپ
رخشندهنین نوه دوتور الینى
ننه قذین كوركنى گلینى

(۱۱) چوق شكرى وار، گنه گلدوخ گوروشدوخ
ایتنلردن بیتنلردن سوروشدوخ
كوسموشدوخدا آلله قویسا باریشدوخ
بیرده گوروش قسمت اولا، اولمیه
عمرلرده فرصت اولا، اولمیه

(۱۲) بوردا خیال میدانلارى گنیشدى
داغلار داشلار بوتون منله تانیشدى
گورجك منى حیدربابا دانیشدى
بو نه سسدر سن عالمه سالوپسان
گل بیر گورك اوزون هاردا قالوپسان

(۱۳) كجاویله بو چایدان چوق گچمیشیك
بو چشمهلردن نه سولار ایچمیشیك
بو یونجالیقلاردا كسوب بیچمیشیك
چپیشلرى قیدیخلیان گونلریم
چپیش گیمى اویناخلیان گونلریم

(۱۴) بو خرمنده آرادان خیر اویناردیخ
جومالاشوب قاریشقا تك قایناردیخ
یواش یواش باخچالارا آغناردیخ
آغاجلاردان چلینك آغاج كسردیك
قوروخجونون قورخوسوندان اسردیك

(۱۵) بو طوله ده سارى اینك دوغاردى
خانم نم اینكلرى ساغاردى
آنا ایسى دام دیواردان یاغاردى
من بزوى قوجاقلاردیم قاشماسین
دیردى باخ بایدا دولسین داشماسین

(۱۶) بو داملاردا چوخلى جزیخ آتمشام
اوشاقلارین آشیقلارین اوتمشام
قورقوشوملى سقه آلوپ ساتمشام
اوشاق نجه هیچ زادینان شاد اولار
ایندى بیزیم غمى دوتمور دنیالار

(۱۷) مكتب قالیر اوشاقلار درس آلیلار
هى یازیلار هىپوزیلار، یالیلار
ملا ابراهیم اوزى اوى قالیلار
آما بیزیم یولداشلاردان قالان یوق
بونلاردان بیر بیزى یادا سالان یوق

(۱۸) بیر وقتینده بو مكتب پرگار ایدى
بیر مسیب بیر ممدسن وار ایدى
بیرى خلفه، بیرى ورزشكار ایدى
آخود بیزله اویناماغا گدردى
ازى بیزه اویناماق ارگدردى

(۱۹) ددیم بالام او مدسن نولوپدى
معلوم اولدى طفیل جوان الوپدى
نه وار نه وار، بورنونان قان گلوپدى
بیر یل اسیر باخیرسان ممدسن یوق
بو كتده بیر بورون قانین كسن یوق

(۲۰) دیم دیون مسیبه نه گكدى
غلام گوردوم آغلار گوزیله گلدى
دى اودا بهالیق دوشدى الدى
دیم یازیق بیزله حاسل بلنلر
بیتمینده آجلارینان النلر

(۲۱) بو مكتبده شعرین شهدین دادمشام
آخوندون آغزیندان قاپوپ اودمشام
گاهداندا بیر آخوندى آلادمشام
باشیم آغریر دیوپ قاچوپ گتمیشم
باخچالاردا گدوب گوزدن ایتمیشم

(۲۲) آزاد اولاندا مكتبرن چخاردیخ
هجوم وروپ بیرىبرین سخاردیخ
یولدا هر نه گلدى وروب یخاردیخ
اوشاق دیمه ایپین قرمیش دانا ده
بیر دانادا دیمه اللى دانا ده

(۲۳) ملك نیاز ایتگین گدوپ یوخ اولوب
امیر اصلان سكته ایله یخلوب
هره قاچوپ بیر دره ده سیخلوب
چرك غمى چیخوپ خلقین آینا
هر كس قالوب اوز جاننین هاینا

(۲۴) كتدى یازیق چراغ تاپیر یاندیرا
گوروم سیزون برقوز قالسین آندرا
كیم بو سوزى اربابلارا قاندرا
نه دور آخر بو ملتین گناهى
دوتسون سیزى گوروم مظلوملار آهى

(۲۵) هر نه آلیر بها وریر قیمتى
اوجوز فقط اكینچینون زحمتى
بیتندن آرتیق بیچنون اجرتى
كند اوشاقى گدیر یولدا ایشلیه
اوردا بلكه قندى باپا دیشلیه

(۲۶) كتدى گلین كیمى دنیانى بزر
اوز عورتى یاماخ یاماغه دزر
ایگنه بزر خلقى ازى لوت گزر
ایندیده وار چرشابلارى آلباخدى
اوشاكلارون قیش پاچاسى چلپاخدى

(۲۷) بو باخچادا آش ترهسى اكردیك
هى سو آچوپ كردیه گوز تكردیك
چیقماق همین دریپ آشا تكردیك
فینقلشلار قاشیقلاردان آسلانى
یاغلى دیسم قورى آغزون ایسلانى

(۲۸) بو دشلرده قوزیلارى یایاردیخ
آخماسونلار اولدز تكین سایاردیخ
قوش قوانى چكوب داشا دایاردیخ
قوش قوان دا ایله بیل كه قاباندى
قورد اوزاقدان دیر بس كه چوباندى

(۲۹) خانم ننم ناخوش اولان ایلیدى
قیش وار ایكن گولگیدى، یلیدى
قیشدا چیقدى یاغیشیدى سلیدى
یوك یاپنى هى چاتیردوخ كه گداخ
سل چیمخروب، مجبوریدوخ قیداخ

(۳۰) نیسان دوشدى بیزده دوشدوخ یاغیشا
كیم باجارا سیللریله بوغیشا
هى دیردوخ بلكه یاغیش یغیشا
بالا كیشى فایطونچمیز گلمیشدى
امامیه قهوهسنده قاكمیشدى

(۳۱) بو زمیده گدوپ گوزدن اتردیك
تونقال قوروپ ستلرى اتردیك
دیوپ گولمك مرادینه یتردیك
ایلده گولسون، مرادینه یتشسون
یوركلرین یارالارى بتشسون

(۳۲) خلورچیلر بوردا خلور داشیردى
بو كولوكدن الاخلار دیرماشیردى
سلر كیمى، نعمت آشوپ داشیردى
هر ایش دییدون هر كیمه گورردى
جان درمانى ایستییدون وردى

(۳۳) ایندى بشر آج قورد تكین اودوخوپ
چمبلنتى، گوز قجردوپ، دوروخوپ
باخیلار كه گورسونر كیم سینخوپ
توكولسنلر اونون لشین یرتسونلار
هره بر دیش انسه سیندن قیرتسونلار

(۳۴) حیدربابا سنده دفینهلر وار
داغلار ودیعهسى، خزینهلر وار
آما سنه بنزرده سینه لر وار
بو سینه لر داغلاریله دانشور
داغلار كیمى گوگلریله قونشور

(۳۵) گور هاردان من سنه سالدیم نفسى
ددیم قیتر سال عالمه بو سسى
سنده یاخشى سیمرغ ایتدون مگسى
سان كه قاناد وردون یله نسمه
هر طرفدن سس وردلر سسمه

(۳۶) حیدربابا سنى وطن بیلمیشدیم
وطن دیوب باش گتوروپ گلمیشدیم
سنى گوروب گوزیاشیمى سیلمیشدیم
حلبو كه لاپ غملى غربت سندیمیش
قارا زندان، آجى شربت سندیمیش

(۳۷) كیم قالدى كه بذه بوغون بورمادى
آتدان آتدان بزه كلك قورمادى
بیر مرد اوغول بزه هاوار دورمادى
شیطانلارى قوجاقلیوب گزدیز سیز
انسانلارى ایاخلیوب ازدیز سیز

(۳۸) دیوار اوجالدى گون بیزه دوشمدى
زندان قارالدى گوز گوزى سشمدى
گوندوز گوزى منیم لامپام گشمدى
سلده باسدى امز دولوپ گول اولدى
چوق یازیغین اوى چونوپ چول اولدى

(۳۹) اول باشى مندن استقبال ایتدیز
سونان چونوب ایشیمده اخلال ایتدیز
اوز ظنوزجه استادى اغفال ایتدیز
عیبى یوقدور كچر گدر عمردور
قیشدا چیقار، یوزى قارا كمردور

(۴۰) منیم یولوم محبت جاده سیدى
سون سوزلریم حقون ارادهسیدى
محبتون، رسالت وعده سیرى
یوقسا منده بیر كسیله قرض یوق
سیاست آدلى منده بیر مرض یوق

(۴۱) حق نه دیور؟ كفره قارشى گتمیوز
نوردان چیقوب ظلمات ایچره ایتمیوز
فریلداغا فرفرا تك بتمیوز
گوردوزده كه اولمادى كفرین دیبى
پولدا ورسه آلماغا تیكمیش جیبى

(۴۲) شیطان بیزیم قبله میزى چوندریب
آلله دین یولدان بیزى دوندریب
ایلانلى چشمه یه بیزى گندریب
منت قویور كه آرخوز نهر اولوب
بیز گوروروك سولار بیزه زهر اولوب

(۴۳) حیدربابا گلیلیخ دان نه چیقار
ظامون اوین صبر و تحمل یخار
درویش اولان صبرون الین برك سیخار
گل قیداخ چیقاق آقا دوزینه
گچاق گنه محبتون سوزینه

(۴۴) دینه اوشاق بیربریله ساذ اولسون
بلكه بو قیش برده چونوب یاز اولسون
چاى چمنلر، اردك اولسون غز اولسون
بیزده باخوب فرحلنوب بیر اوچاق
سنیق سالخاخ قانادلارى بیر آچاق

(۴۵) بو باخچادان آلچالارى درردیك
قیش آدینا چیقوب دامدا سرردیك
هى ده چیقوپ یالانان چوندرردیك
قیش زومارین یایدا ییوب دویاردیق
بیر كلى ده منت خلقه قویاردیق

(۴۶) اولر قالیر اوصاحبى یوق اوزى
اجاقلارین آنجاق ایشیلدیر گوزى
گدنلرین چوق قلیپدور سوزى
بیزدنده بیر سوز قالاجاق آى آمان
كیملر بیزدن سالاجاق آى آمان

(۴۷) بیزدن سورا كرسیلرین تویندا
كندین ناغیلاریندا سوز سویندا
قار ننهنین چاخماغیندا قویندا
حیدربابا ازین قاتار سوزلره
ایشگى كیمى خمار ورر گوزلره

(۴۸) عاشیق دیر بیر نازلى یار واریمیش
عشقیندن اودلانوب یانار واریمیش
بیر سازلى، سوزلى شهریار واریمیش
اودلار سونوب اونون اودى سونمیوپ
فلك چونوپ اونون چرخى چونمیوپ

(۴۹) حیدربابا آلچاقلارون كشگ اولسون
بیزدن سورا قالانلارا عشق اولسون
كشمشلرون گلنلره مشق اولسون
اولادیمیز مزهبنى دانماسون
هر ایچى بوش سوزلره آلدنماسون

آتــــــــــــا شهریار